“संध्याकाळी ६ नंतर माळेगाव बसस्थानकाला एसटीचा विसर! विद्यार्थी-प्रवाशांचा संताप; बसस्थानकात बस आणण्याची जोरदार मागणी”

माळेगाव | प्रतिनिधी सुरज वाघमोडे

माळेगाव बसस्थानकावर संध्याकाळी सहा वाजल्यानंतर अनेक एसटी बस स्थानकाच्या आत न येता थेट बाहेरील मुख्य रस्त्यावरून पुढे जात असल्याचा गंभीर प्रकार समोर आला आहे. त्यामुळे बसस्थानकात बसची वाट पाहणारे विद्यार्थी, विद्यार्थिनी, महिला, ज्येष्ठ नागरिक आणि इतर प्रवाशांना मोठा मनस्ताप सहन करावा लागत आहे.

दररोज शिक्षणासाठी आणि नोकरीसाठी प्रवास करणारे अनेक विद्यार्थी संध्याकाळी बसस्थानकात उभे राहून बसची प्रतीक्षा करतात. मात्र संबंधित बस स्थानकात न शिरता थेट बाहेरील रस्त्याने निघून जात असल्याने अनेकांना बस चुकते. परिणामी त्यांना उशिरापर्यंत थांबावे लागते किंवा खासगी वाहनांचा आधार घ्यावा लागतो.

बसस्थानक असतानाही बस आत येत नसल्यामुळे बसस्थानकाच्या उद्देशालाच हरताळ फासला जात असल्याची भावना प्रवाशांमध्ये व्यक्त होत आहे. प्रवाशांच्या सोयीसाठी उभारण्यात आलेल्या बसस्थानकाचा योग्य वापर होत नसल्यास त्याचा फटका सर्वसामान्य नागरिकांनाच बसत आहे.

विद्यार्थ्यांच्या सुरक्षिततेचाही हा महत्त्वाचा प्रश्न असून, बाहेरील रस्त्यावर धावपळ करून बस पकडणे धोकादायक ठरू शकते. त्यामुळे कोणतीही दुर्घटना घडण्यापूर्वी संबंधित परिवहन प्रशासनाने तातडीने दखल घेऊन संध्याकाळी सहा वाजल्यानंतरही सर्व बस नियमितपणे माळेगाव बसस्थानकाच्या आत आणाव्यात, अशी जोरदार मागणी विद्यार्थी, पालक आणि प्रवाशांकडून करण्यात येत आहे.

आता परिवहन विभाग या गंभीर समस्येकडे लक्ष देऊन त्वरित कारवाई करणार का, याकडे माळेगावकरांचे लक्ष लागले आहे.