मुख्य मजकुरावर जा
ताजा बातम्या
Sunday, 22 November 2026

मतदानाच्या पूर्वसंध्येला बारामती पोलिसांची धडक कारवाई; गावठी पिस्टलसह २ लाख २६ हजारांचा मुद्देमाल जप्त

nndlivenews@gmail.com वार्ताहर
October 23, 2026 1 मिनिट वाचन 21 वाचन

टी.सी. कॉलेज परिसरात कारवाई; तीन जिवंत काडतुसे व स्विफ्ट कार जप्त, आदित्य शेलारला अटक

बारामती | प्रतिनिधी बारामती शहरात मतदानाच्या पूर्वसंध्येला बेकायदेशीर अग्निशस्त्र बाळगणाऱ्या एका तरुणाविरुद्ध बारामती शहर पोलिसांनी धडक कारवाई केली. या कारवाईत एक गावठी पिस्टल, तीन जिवंत काडतुसे आणि लाल रंगाची मारुती सुझुकी स्विफ्ट कार असा एकूण २ लाख २६ हजार २०० रुपयांचा मुद्देमाल  जप्त करण्यात आला आहे. या प्रकरणी आदित्य शेलार (रा. आमराई, बारामती) याला अटक करण्यात आली आहे. प्रभारी परिविक्षाधीन पोलीस उपअधीक्षक मनीषा ओमासे यांच्या नेतृत्वाखाली २२ ऑक्टोबर रोजी रात्री ही कारवाई करण्यात आली.

महाराष्ट्र विधान परिषदेच्या पुणे विभाग पदवीधर व शिक्षक मतदारसंघाच्या मतदानाच्या पार्श्वभूमीवर कायदा व सुव्यवस्था अबाधित राखण्यासाठी बारामती शहर पोलिसांकडून विशेष सतर्कता बाळगण्यात येत आहे. याचदरम्यान, टी.सी. कॉलेज परिसरात एका व्यक्तीकडे बेकायदेशीर अग्निशस्त्र असल्याची गोपनीय माहिती पोलिसांना मिळाली होती. या माहितीच्या आधारे पोलिसांनी तातडीने हालचाली करत संबंधित संशयिताचा शोध सुरू केला.

२२ ऑक्टोबर रोजी रात्री आठ वाजण्याच्या सुमारास पोलीस शिपाई अक्षय सिताफ यांना गोपनीय बातमीदारामार्फत आदित्य शेलार हा लाल रंगाच्या स्विफ्ट कारमधून टी.सी. कॉलेज परिसरात अग्निशस्त्र घेऊन फिरत असल्याची माहिती मिळाली. या माहितीचे गांभीर्य लक्षात घेऊन वरिष्ठ अधिकाऱ्यांना कळविण्यात आले. त्यानंतर प्रभारी परिविक्षाधीन पोलीस उपअधीक्षक मनीषा ओमासे यांनी स्वतः पोलीस पथकाचे नेतृत्व करत संशयिताचा शोध घेण्यासाठी पथकासह घटनास्थळाकडे धाव घेतली.

पोलिसांनी परिसरात शोध घेतला असता रात्री सुमारे ८.३५ वाजण्याच्या सुमारास आठ नंबर ग्राउंडजवळील मोरया पॅलेस इमारतीसमोरील सार्वजनिक रस्त्यावर लाल रंगाची स्विफ्ट कार उभी असल्याचे आढळले. या कारच्या चालकाच्या सीटवर आदित्य शेलार बसलेला होता. दोन स्वतंत्र पंचांच्या उपस्थितीत वाहनाची तपासणी केली असता चालकाच्या सीटजवळील पुढील भागात एक लोखंडी देशी बनावटीचे गावठी पिस्टल आणि त्याच्या मॅगझीनमध्ये एक जिवंत काडतूस आढळले.

यानंतर पोलिसांनी शेलार याची अंगझडती घेतली असता त्याच्या जॅकेटच्या उजव्या खिशात आणखी दोन जिवंत काडतुसे मिळून आली. संबंधित अग्निशस्त्र बाळगण्यासाठी वैध परवाना आहे का, अशी विचारणा केली असता त्याच्याकडे कोणताही शस्त्र परवाना नसल्याचे त्याने सांगितल्याची माहिती पोलिसांनी दिली.

या कारवाईत २५ हजार रुपये किमतीचे गावठी पिस्टल, १ हजार २०० रुपये किमतीची तीन जिवंत काडतुसे आणि दोन लाख रुपये किमतीची लाल रंगाची मारुती सुझुकी स्विफ्ट कार असा एकूण २ लाख २६ हजार २०० रुपयांचा मुद्देमाल पोलिसांनी जप्त केला. रात्री ८.४५ ते ९.१० या वेळेत दोन पंचांच्या उपस्थितीत जप्ती पंचनामा करण्यात आला.

या प्रकरणी बारामती शहर पोलीस स्टेशनमध्ये गुन्हा रजिस्टर क्रमांक ४७३/२०२६ अन्वये भारतीय हत्यार अधिनियम, १९५९ च्या कलम ३ सह २५(१-ब)(अ) नुसार गुन्हा दाखल करण्यात आला आहे. कायदेशीर प्रक्रिया पूर्ण करून आरोपी आदित्य शेलार याला अटक करण्यात आली आहे.

पोलिसांनी दिलेल्या माहितीनुसार, प्राथमिक चौकशीदरम्यान आरोपीने हे अग्निशस्त्र मयूर मोरे (रा. मेडद, ता. बारामती) याच्याकडून मिळाल्याचे सांगितले आहे. त्यामुळे या अग्निशस्त्राचा मूळ स्रोत काय आहे, त्याचा बेकायदेशीर पुरवठा किंवा हस्तांतरण झाले आहे का आणि या प्रकरणात अन्य कोणाचा सहभाग आहे का, याचा तपास सुरू आहे. या संदर्भातील पुढील निष्कर्ष तपासातून स्पष्ट होणार आहेत.

पोलीस अधीक्षक संदीप सिंह गिल, अपर पोलीस अधीक्षक गणेश बिरादार आणि उपविभागीय पोलीस अधिकारी चैतन्य कदम यांच्या मार्गदर्शनाखाली ही कारवाई करण्यात आली. प्रभारी परिविक्षाधीन पोलीस उपअधीक्षक मनीषा ओमासे यांच्या नेतृत्वाखाली तसेच पोलीस निरीक्षक श्रीशैल चिवडशेट्टी यांच्या समन्वयातून ही मोहीम राबविण्यात आली. या कारवाईत पोलीस हवालदार क्षीरसागर, पोलीस शिपाई कवितके, पोलीस शिपाई अक्षय सिताफ आणि पोलीस हवालदार अभिजीत कांबळे यांनी सहभाग घेतला.

मतदानाच्या पार्श्वभूमीवर सार्वजनिक ठिकाणी बेकायदेशीर अग्निशस्त्र बाळगल्याप्रकरणी झालेली ही कारवाई कायदा व सुव्यवस्थेच्या दृष्टीने महत्त्वपूर्ण मानली जात आहे. संभाव्य गैरवापराचा धोका लक्षात घेऊन पोलिसांनी वेळेत कारवाई केल्याचे प्रसिद्धीपत्रकात नमूद करण्यात आले आहे.

दरम्यान, बारामती शहर परिसरात बेकायदेशीर अग्निशस्त्रे बाळगणाऱ्या किंवा त्यांचा पुरवठा करणाऱ्या व्यक्तींविरुद्ध कायद्यानुसार कठोर कारवाई करण्यात येणार असल्याचा इशारा पोलिसांनी दिला आहे. नागरिकांनी परिसरात संशयास्पद हालचाली आढळल्यास तातडीने पोलिसांना माहिती देऊन सहकार्य करावे, असे आवाहन बारामती शहर पोलीस स्टेशनच्या वतीने करण्यात आले आहे.

nndlivenews@gmail.com

NND LIVE NEWS is a Marathi digital news platform with 3 years of journalism experience, delivering fast, accurate, and reliable news from across Maharashtra. We cover breaking news, crime, politics, social issues, and important events with a commitment to truth, transparency, and fearless journalism. NND LIVE NEWS – Fearless Journalism, Standing with the Truth!

सर्व लेख पहा

तुमची प्रतिक्रिया द्य NND LIVE NEWS

Your email address will not be published. Required fields are marked *